ن: مامۆستا ئاواره
رێكه‌وتی 8/8/1386 له كۆبوونه‌وه‌ی 613 شوورای باڵای فه‌رهه‌نگی، ئه‌ساسنامه‌ی شوورای ده‌وڵه‌تی به‌رنامه‌ڕێژی فێرگه‌كانی ئه‌هلی سوننه‌ت له‌ژێر به‌رپرسایه‌تیی ئه‌حمه‌دی‌نژاد په‌سند كرا. منیش ده‌مهه‌وی بابه‌تیك له‌سه‌رئه‌م په‌سه‌ند كراوه پێشكه‌ش به ئێوه خۆشه‌ویستان بكه‌م. به‌ڕێزان ئه‌مین بوون، دادپه‌روه‌ری، یه‌كسان بوون‌و ئازادی وته‌یه‌كن كه هۆی ئه‌ساسی شۆڕشه‌كانی خه‌ڵك وهه‌ڵگرتنی باری ئێش‌و ئازاری زۆر له شۆڕشگێڕانی مێژوو بووه‌‌و ئه‌و وتانه ئه‌وه‌نده پڕ بایه‌خ بوون كه زۆر له پێغه‌مبه‌ران‌و رێبه‌رانی گه‌وره‌ی مێژوو گیانیان له‌سه‌ر داناوه‌و پێشكه‌ش به گه‌له‌كه‌یان كردووه، هه‌رچه‌ند له كۆمه‌ڵگایه‌كی سالم حكوومه‌ته‌كان ئه‌مین بوونی خه‌ڵك به ئه‌ركی سه‌ر شانی خویان ده‌زانن تاكوو خه‌ڵك بتوانن ژیانێكی خۆشیان هه‌بێ‌‌و خه‌ڵك بتوانن به ئازادی وه‌دوای دینداری خۆیان بكه‌ون، به‌ڵام له ئێران كه رێژیم ده‌م له ئیسلامی ته‌شه‌یووع ده‌دات‌و پێی وایه كه ده‌بێته هۆی ناردنی خه‌ڵك بۆ به‌هه‌شتی خوا، ده‌بێ به‌رپرسانی رێژیمی ئێران تێ‌بگه‌ن كه هیچ كه‌س به زۆری‌و ئه‌و جۆره‌ی كه ئه‌وان ده‌یانهه‌وێ ناچن بۆ ئه‌و به‌هه‌شته.
له كۆمه‌ڵگای ئێران كه پڕه له ئایینی جیاوازو بانی جیا، رێژیمی ئێران له مێژووی 30 ساڵه‌ی خۆی دا ئه‌وه‌ی كه له‌ناو یاسای ئێراندا وتوویانه هیچكات به‌پێی یاسایه‌ك كه خۆیان دایانڕشتووه پێیدا نه‌ڕۆشتوون، به پێچه‌وانه هه‌ر رۆژه به جۆریك ویستوویانه كه دژی ئه‌و خه‌ڵكه هه‌ستنه‌وه. ئه‌گه‌ر له سه‌ره‌تای شۆڕشی گه‌لانی ئێران خومه‌ینی فتوای جیهادی دژی خه‌ڵكی كوردی دا، ئێستاش به شیوه‌یه‌كی دیكه میراتگرانی رێژیمی خومه‌ینی ده‌یانهه‌وی بیرو باوه‌ڕی خه‌ڵكی سوننه‌ت به‌تایبه‌ت خه‌ڵكی كورد به‌ره‌و ئه‌نفال به‌رێت.
له سه‌ره‌تای شۆڕشی گه‌لانی ئێران سوننیه‌كانی ئێران بۆ لابردنی رێژیمی پاشایه‌تی له ئێراندا به‌شدار بوون‌و كاتێك كه رێژیمی كۆماری ئیسلامی هاته سه‌ركار ده‌می له ئازادی‌و یه‌كیه‌تی له نیوان خه‌ڵك ده‌داو هه‌میشه باسی وشه‌ی شه‌هاده‌تی ده‌كردو ته‌نانه‌ت گه‌یشته جێگایه‌ك كه حه‌وتوی "وه‌حده‌ت"ی داناو زۆربه‌ی گه‌لانی ئێران پێیان وابوو رێژیم باس له ئیسلامی زه‌مانی پیغه‌مبه‌ری خوا(ح م س) ده‌كات، به‌پێی ئایه‌تی قورئان ده‌چێته پێشه‌وه به‌ڵام به پێچه‌وانه، ئازادی بوو به‌هۆی گیرانی زور له رۆشنبیران‌و پسپۆڕان، كه تا ئیستا هه‌ر درێژه‌ی هه‌یه، یه‌كیه‌تیی خه‌ڵك بوو به هۆی شه‌ڕی نێوخوی خه‌ڵك، وه‌ك شه‌ڕی تورك‌وكورد له شارێكی وه‌ك نه‌غه‌ده‌‌و حه‌وتووی وه‌حده‌ت بوو به‌هۆی نه‌بوونی یه‌ك كاناڵی ئاسمانی بۆ ئه‌هلی سوننه‌ت له ئێران‌و چاپ نه‌كردنی كتێبه‌كانی ئه‌هلی سوننه‌ت كه ده‌بوو له‌ژێر چاودێری وه‌زاره‌تی فه‌رهه‌نگ‌و ئیرشادی ئیسلامیی ئێران بێت. هه‌روه‌ها نه‌بوون‌و وه‌ڵام نه‌دانه‌وه‌ی سه‌رانی رێژیم به دانانی مزگه‌وتێك بۆ ئه‌هلی سوننه‌ت له تاران‌و هه‌روه‌ها بوو به‌هۆی دانانی خه‌تیبی روژی هه‌ینی له شارو شارۆچكه‌كاندا كه ده‌بێ له‌ژیر چاودێری رێژیم بێت‌و هه‌روه‌ها بوو به‌هۆی دانانی ناوه‌ندی گه‌وره‌ی ئیسلامی له هه‌موو شوێنه كوردنشینه‌كان له ئێران، كه دانانی ناوه‌ند بوو به‌هۆی جیابوونه‌وه‌ی خه‌ڵك له مامۆستایانی ئایینی‌و داخستنی فێرگه‌كان‌و حوجره‌كان له‌كوردستان دا، به‌ڵام له شوێنێكی وه‌كوو به‌لووچستان‌و خوراسان‌و هورموزگان كه خه‌ڵك باری ئابووری ئه‌و فێرگانه‌یان گرتۆته ئه‌ستۆ، رێژیم نه‌یتوانیوه به‌و جۆره‌ی كه ده‌یهه‌وێ بیانهێنێته ژێر چاودێری خۆی.
به‌ڵام له كوردستانیش سه‌ره‌ڕای ئه‌وه كه خه‌ڵك باری ئابووری فه‌قێكانیان گرتوه‌ته ئه‌ستوی خۆیان، به‌ڵام نه‌بوونی فێرگه‌یه‌كی گشتی‌و زانكۆیه‌كی وه‌ك فێرگه‌كانی به‌لووچستان وخوراسان‌و هورموزگان، رێژیم به ده‌رفه‌تی زانی كه خه‌ڵك‌و مامۆستایانی ئایینی له كوردستاندا به دامه‌زراندنی ناوه‌ندی گه‌وره‌ی ئیسلامی لێك جیا بكاته‌وه. رێژیم پیلانی خۆی داڕشت‌و له پیلانه‌كه‌شی‌دا سه‌ركه‌وت‌و چاوی مامۆستایانی ئایینی ئێمه‌ی به كیلۆیه‌ك برنج‌و نیوكیلۆ قهندو رۆن‌و جاری واش هه‌یه كه كیلۆیه‌ك شه‌كریشی له‌گه‌ڵه، ئه‌مه‌ش هه‌ر به سێ مانگ یان چوار مانگ رووده‌دا. جاری واشه كه رێژیم بۆ پیلانێك كه له‌سه‌ریدایه مریشكێك یان دوو مریشك ده‌دا به مامۆستایانی ئایینی ئێمه‌‌و به‌وانه چاوی هه‌موانی به‌ستووه.
ئێستاش به په‌سه‌ندكراوی پێكهاته‌ی شوورای ده‌وڵه‌تی به‌رنامه‌رێژی فێرگه‌كانی ئایینی ئه‌هلی سوننه‌ت له ئێران كه به به‌رپرسایه‌تی ئه‌حمه‌دی‌نژاد به بێ هیچ پرس‌وڕایه‌ك به مامۆستایان‌و پسپۆڕانی ئه‌هلی سوننه‌ت ئه‌م په‌سه‌ندكراوه‌ی په‌سه‌ند كردووه كه ئامانجه‌كه‌ی به‌رنامه داڕشتنه بۆ فێرگه‌كانی ئه‌هلی سوننه‌ت له‌لایه‌ن شوورایه‌كی 11 كه‌سی، كه 3 له‌وان له ئه‌هلی سوننه‌تن كه ئه‌م 3 كه‌سه نوێنه‌ری مه‌جلیسن‌و ئه‌وه‌ش بۆته هۆی ئاڵوزی‌و ناكۆكی له نێوان ئه‌هلی سوننه‌ت له ئێراندا.
ئه‌م په‌سه‌ندكراوه دژایه‌تی هه‌یه له‌گه‌ڵ یاسای ئێران، چونكه له یاسای ئێراندا له چه‌ند به‌ند دا باس له مافی ئه‌هلی سوننه‌ت ده‌كات كه ده‌وڵه‌ت نابێ ده‌ست له كاروباری مه‌زهه‌بی ئه‌هلی سوننه‌ت بدات‌و ئه‌هلی سوننه‌ت له هه‌موو بارێكه‌وه وه‌ك رێوڕه‌سمی مه‌زهه‌بی‌و خوێندنی ئایینی خویان ئازادن كه به‌پێی ئایینی خۆیان بچنه پێش، ئه‌وه‌ش له حاڵیك دایه كه رێژیم بۆ خۆی له یاسادا رێگه‌ی بۆ داناوه كه ئه‌گه‌ر ده‌وڵه‌ت ده‌ست له كاروباری ئه‌وان وه‌ربدات به كۆمیسیۆنی ئه‌سلی 90 سكاڵای خۆیان بكه‌ن، ئه‌ویش ئه‌گه‌ر وه‌ڵامێكیان هه‌بیت!
ئایا شوورای باڵای فه‌رهه‌نگی ئه‌و به‌رنامه‌یه‌ی داڕشتووه، بۆ فێرگه‌كانی ئه‌هلی ته‌شه‌یووعیشی داناوه؟
ئایا بۆ دانانی ئه‌م هه‌موو فێرگانه‌ی ئه‌هلی ته‌شه‌یووعیش پێویستی به مۆڵه‌ت هه‌بوه؟
ئایا بۆ دامه‌زراندنی فێرگه‌كانی ئه‌هلی ته‌شه‌یووع له یه‌ك زانای ئایینی ئه‌هلی سوننه‌ت چ له ئێران‌و چ له ده‌ره‌وه‌ی ئێران پرس‌و بیروڕایه‌كیان كردوه؟
ئایا نابێ بزانین كه ده‌ست تێوه‌ردانی رێژیم له كاروبار‌و شێوه‌ی خوێندن له فێرگه‌كانی ئه‌هلی سوننه‌ت، كه خۆیان به هاوكاریی خه‌ڵكی موسوڵمان له‌سه‌ر پێی خۆیان راوه‌ستاون بێ ئه‌وه‌ی چاویان له یارمه‌تی رێژیم بێ، ده‌بێته هۆی داخستنی فێرگه‌كان كه ناوه‌ندی گه‌وره‌ی ئیسلامی به‌سه‌ر حوجره‌كانی كوردستانی‌دا هێنا؟
ئێمه كه چاو له رێبه‌رانی ئێران ده‌كه‌ین هه‌ر باس له یه‌كیه‌تیی خه‌ڵكی موسوڵمان ده‌كه‌ن، به‌ڵام ئه‌و وتانه هه‌موو هه‌ر دروشمدانه.
رێژیم ده‌یهه‌وێ به فریودانی هیندێك له مامۆستایانی ئایینی به‌ڵێنیی ئه‌وه‌ی كه خوێندنتان ده‌بێته فه‌رمیی بوون، ئه‌م سیستمه نابه‌رابه‌ره‌ی دامه‌زرێنێ كه دژایه‌تی هه‌یه له‌گه‌ڵ یاسای قورئانی پیرۆز‌و یاسای ئێران‌و یاسای نێو وڵاتان، رێژیم زۆر بێ‌شه‌رمانه به بێ له‌به‌رچاو گرتنی مافی مرۆڤـ هه‌ر خه‌ریكه بۆ له‌نێو بردنی مه‌زهه‌بی سوننه‌ت له ئێرانداو ده‌یهه‌وێ كه هه‌موو فێرگه‌كانی ئه‌هلی سوننه‌ت به زمانی فارسی بخوێنن. ئه‌وه‌ش ئه‌وه ده‌گه‌یه‌نێ كه رێبه‌ری ئێران خامنه‌یی چه‌ند ساڵ له‌مه‌وبه‌ر له زانكۆی زه‌نجان وتی كه ده‌بێ تا 50 ساڵی داهاتوودا كارێ بكه‌ن كه هه‌موو وڵاتان پێویستیان به زمانی فارسی بێ. ئه‌وه جێگای پرسیاره كه بۆ ده‌بێ مامۆستایانی ئایینی ئێمه له به‌رانبه‌ر ئه‌م رێژیمه دژ به قورئانه فریو بخۆن؟ بۆ ده‌بێ فریوی قهندو برنج‌و شه‌كره‌كه‌یان بخۆن؟ ئه‌و حوجره‌ی كه مامۆستایان تێیدا بوون "نه‌هرییان، پیرانیان، حه‌فیدیان‌و قاچیانیش" له‌وێ‌دا بوون. ئیتر به‌سه فریوخواردن‌و نوستن، كاتی هه‌ڵمه‌ته. زمان‌و فه‌رهه‌نگ‌و خه‌ڵكمان به ئه‌نفال رۆی، ئێستاش خه‌ریكه مه‌زهه‌بمان به ئه‌نفال بڕوات. رێژیم ده‌یهه‌وێ به‌و پیلانه ناكۆكی‌و نائارامی بێنێته ناو خه‌ڵكی سوننه‌ت‌و شێعه له ئێران به تایبه‌ت له كوردستان، چونكه هێندێك له براده‌رانی كوردمان شێعه‌ن‌و ده‌بێ هه‌ڵوێست بگرین تا رێژیم نه‌توانێ پیلانی خۆی بگێڕی‌و ده‌بێ بزانین كه ئه‌گه‌ر رێژیم له‌و پیلانه‌دا سه‌ركه‌وێ ده‌بێ چاوه‌ڕێ بین كه له داهاتوودا ئه‌و جار برایه‌تی ئێمه‌ی كورد له‌گه‌ڵ كورده یارسانیه‌كان‌و مه‌سیحییه‌كان‌و یه‌هودییه‌كان‌و... لێك بدات. بۆیه پێویسته كه له به‌رانبه‌ر ئه‌و پیلان رشتنه‌دا هه‌ڵوێست بگرین.
مامۆستا ئاواره
ئه‌ندامی یه‌كیه‌تیی زانایانی ئایینی كوردستانی ئێران
هیچ نظری موجود نیست:
ارسال یک نظر