بروسکه‌ی پرسه‌و سه‌ره‌خۆشی یزاکا به‌ بۆنه‌ی کۆچی دوایی مامۆستایه‌کی ئایینی

کل نفس دائقة الموت

به‌داخه‌وه‌ ئاگادار کراینه‌وه‌ جه‌نابی مامۆستا مه‌لا عبیدالله‌ پایمه‌رد به‌ هۆی نه‌خۆشی شێرپه‌نجه‌{سه‌ره‌تان}له‌ ته‌مه‌نی لاوه‌تیدا چه‌ند رۆژ له‌ مه‌وپێش کۆچی دوایی کرد ،خودالێخۆشبوو هاوکارییه‌کی زۆری قوتابخانه ی سه‌لاحه‌دینی ئه‌یوبی له‌ شاری پیرانشار سه‌ر به‌ رۆژهه‌ڵاتی کوردستان ده‌کرد وله‌ لایه‌ن فه‌قێکان ومامۆستایانی ئایینی ئه‌و ده‌ڤه‌ره‌ رێزێکی تایبه‌تی هه‌بوو، یه‌کێتی زانایانی ئایینی ئێران وێرای هاوده‌ردی وخاوخه‌می خۆی سه‌باره‌ت به‌ کۆچی دوایی ئه‌و مامۆستا به‌رێزه‌ پرسه‌وسه‌ره‌خۆشی خۆی ئاراسته‌ ئه‌ندامانی بنه‌ماڵه‌ به‌رێزه‌که‌یان وقوتابخانه‌ی سه‌لاحه‌دینی ئه‌یوبی له‌ پیرانشار ده‌کات هیوادارین به‌هه‌شتی به‌رین جێگایی بێت{انا لله‌ وانا الیه‌ راجعون}
یه‌کێتی زانایانی ئایینی کوردستانی ئێران

8ی خاکه‌لێوه‌ی 1394ی هه‌تاوی

بروسکه‌ی ماته‌مینی یزاکا به‌ بۆنه‌ی ساڵرۆژی له‌ سێداره‌دانی سه‌رۆک کۆماری نه‌ته‌وه‌ی کورد:

به‌ نێوی خوداوه‌ندی مه‌زن

بەبۆنەی  ساڵڕۆژی شەهیدبوونی پێشەوای نەمر قازی محەممەد رێبەری مەزنی نەتەوەکەمان بە دەستی رێژیم دڕندەی شاهەنشاهی، خەم و پەژارەی خۆمان دەردەبڕین.

حەزرەتی پێشەوا قازی محەممەد رێبەری نەتەوەیی کوردستان و دامەزرێنەری حیزبی دێموکراتی کوردستانی ئێران لەگەڵ هاوڕێیانی سەیفی قازی و سەردی قازی، بە گیانبازی و دانانی گیانی خۆیان، ئەمەگ و وەفاداریی له‌ مه‌ڕ پاراستنی رۆڵه‌کانی نەتەوەکەیان کەلە رۆژی راگەیاندنی کۆماردا بە قورئانی پیرۆز سوێندنیان خواردبوو، نیشان دا و  سەرەڕای ئەوەی کە دەیانزانی چ دەرەنجامێکی هەیە، خۆیان رادەستی هێزەکانی حکوومەتی شاهەنشاهی کرد و لە رۆژی ١٠ی خاکەلێوەی ساڵی ١٣٢٦ی هەتاوی، لە سێدارە دران.

بۆیە شیاوە ١٠ی خاکەلێوەی هەموو ساڵێک وەکوو رۆژی لەسێدارە دانی یەکەمین سەرکۆماری کوردان کە چەندین هەزار شەهیدی دیکەش لە رێبازی ئەو کۆمارە و پێشەواکەیاندا گیانیان بەخت کردووە، بکرێتە رۆژی شەهیدانی کوردستان لە هەر چوار بەشی کوردستان.

ئێمە وەکوو یەکیەتیی زانایانی ئایینیی کوردستانی ئێران هاوخه‌می خۆمان له‌ گه‌ڵ رۆڵه‌ به‌هه‌مه‌گه‌کانی نه‌ته‌وه‌که‌مان و حیزبی دیموکراتی کوردستانی ئێران له‌ ساڵرۆژی له‌ سێداره‌دانی پێشه‌واکه‌مان دەردەبڕین.هیوادارین رێگایی پڕ له‌ سه‌روه‌ری قازی وهاورێیانی شلگیرانه‌ به‌رده‌وام بێت تاوه‌دیهاتنی هه‌موو ئاواته‌کانی ئه‌و سه‌رکۆماره‌ مه‌زنه‌ی نه‌ته‌وه‌که‌مان.

رۆحی پێشەوا و هەموو شەهیدانی کوردستان شاد و رێگایان پڕ رێبواربێت.

یەکیەتیی زانایانی ئایینیی کوردستانی ئێران

9ی خاکه‌لێوه‌ی 1394ی هه‌تاوی

دەی (١٠) خاکە لێوە لوتکەی حەماسەو قوربانیدانە:مه‌لا برایم مه‌جیدپور

            دەی (١٠) خاکە  لێوە   لوتکەی  حەماسەو  قوربانیدانە

 بەناوی   خوای  دڵاوای    دلۆڤان

       ولاتحسبن الذین قتلوا فی سبیل  الله أمواتا  بل  أحیاء   عند  ڕبهم  یرزقون.

دەی  خاکەلێوە  لە مێژوی خەباتی ڕزگاریخوازانەی گەلەکەماندا   تاقانەیەو  مەزنترین و بایخدارترین  ڕێبەری   ئەو  ڕێبازە سەری   لە پێناوی  ڕزگاری گەل ونیشتمانەکەیدا لەو  رۆژەدا   داناوە. ڕەنگە  هەر  نەبن  یان  دەگمەن بن   ڕێبەرانێک  کە  ئاوا سەربەرزانە بچنە  ژێر  پەتی  سێدارەو  شێرانە  دوایین  وتەی ئەوە بێ  کە بەدوژمن بڵێی:ئێوە قازی  محەممەدێک  لە دار  دەدەن ، بەڵام  لەهەر  دڵۆپەخوێنێکی    هەزاران پێشەوا شین  دەبێتەوەو  لکو پۆپیان   بەهەموو  کوردستاندا  بڵاو  دەبێتەوە.   ئەو  پەیامە نیشاندەری ئەو  ڕاستیەیە  کە  پێشەوای  نەمر  لەداهاتوی  گەلەکەی  نیگەران   نەبوەو دڵنیا  بوە کە خەباتی  گەلەکەی  تا دەگاتە  لوتکەی   سەرکەوتنو   ڕزگاری  هەربەردەوام  دەبێ. ئیمانی بەوە  هەبووە کە ڕزگاری  گەلو  نیشتمان   ویستو  داوای تاکو حیزب و  تاقمێک  نیە بەڵکو  ئامانجی  نەوە  لەدوای  نەوەی  ئەو  گەلەیەو  ئەو  خەباتە ناوەستێ و   هەرەس ناهێنێ ، هەتا  کوردێک  لەو کوردستانەدا  بمێنێ.

ئـەوەی دەبێ  سرنـجێکی  وردی بـدرێتێ   وشەی  شەهیدی   فـی سبیل الله  یـە . لێرەدا شرۆڤەیەکی  وردی  پێویستە  تا  بزاندرێی داخوا  شەهیدی ڕێگای  خوا کێن. ئەو  کەسانەن کە  دەیانەوێێ  بەزەبری  شمشیر خەڵک  وادار بکەن  کە بڵێی  لا اله الاالله وبەس  دەکوژرێین ؟! بێگومان  نەخێر.کە خوا خۆشی  ئەو دان پێداهێنانە بەزۆرەی قه‌بوڵ نییە.شەهید  بـەو  کەسانە دەکوترێ کە لە ڕێگای پاراستنی زێدو نیشتمانێکی خـوا پێداو ، پاراستنی  مافێکه‌ لە قورعاندا  ئیقرار  پێکراوه‌ ، زیندو راگرتنی زمان و کلتورێکی شەرعی و  حاشا لێ نەکراو،گەیشتن بەئامانجێکی  ڕەوای    مرۆڤانە و  مافی نەتەوایەتی بە  بەڵگەوئایەی قورعانی  سەلمێندراو ، کـە  بـەرەنگاری  زاڵـمان ـو دەستدرێژ کەران دەبنەوەو  لەو ڕێبازەدا  خۆیان   دەکەنە   قوربانی .ڕێبەری هەمیشە زیندومان  بە ئاگاهی تەواو زانستیانە   لە ماناو  ناوەرۆکی  ئەو ئایەتە  کە  دەڵێ:{وامەزانن ئەوانەی  لە ڕای خوادا  گیانیان بەخت کردوە مردون ، ئەوانە   زیندون ولە خواوە ڕۆزیان پێدەدرێی.}سەری  کردۆتە  قوربانی گەلەکەی. هەروەها شاعیری کورد بەزمانی   شێعر  تەعبیرلەو بابەتە دەکاو  دەڵێ : [  پێی  ناوێی  بۆ  شەهیدی وەتەن شێوەن و  گرین     نامرن ئەوانە  وا لە دڵی  میللەتا  دەژین.]   ئەوەنیە  پێشەوا دوای نیزیک بە  حەفاتا ساڵ ناوو  ڕێبازی  هەروا  بەردەوامە   بەسەدان  هەزارڕۆڵەی کورد لە ژێر سێبەری ناوی  ئەودا  ڕێبازەکەیان گرتوەو  بەری نادەن جۆگەلەی خوێنیان دەچێتەوە ناودەریای خوێنی  پێشەواو  هاواڵانیو  سەر جەم  شەهیدانو بۆ ڕاماڵینی کۆشکی زۆرداران هەرشەپۆلان دەداو  سەر ئەنجام  ڕۆژێک هەڵ دەچێ ودەبێتە تۆفان وگەردەلولێک هەمووداگیر کەرانی  کوردستان دەخاتە زبـڵدانی مێژوو کوردستان وگەلەکەی  ڕزگاردەکا. زۆر  بـەداخم  کە ئێستاش  مامۆستایانی  ئایینی کورد  بە پارێزەوە  باس  لە خوایی بونی   مافی  نـەتەوایەتی  خـۆیان  دەکەنـ وڕەنگە گومانیان لەوە دابێ  کە کورد بوون و بەکوردی  قسەکردن  مافێکی شەرعیەو دژایەتی دەگەڵ دین  نیە !  یـان  بـڕوایان بـەوەنیە  کە خوای   مـەزن  لـە پێش ئەرکدارکردنی مەسایلی ئـایینی  مـافی بە نەتەوە بـوون ـو قسە کردن بەزمانی زگماکی وژیانی لە سەر زەویەکدا پێداوین  کە  ناوی کوردستانە . پاراستنی ئەو بەشە خواپێداوانەش لە پێشەوەی هەموو ئەرکەکانە. ئەگەر  ڕاستە ئیسلام  دینێکی  عالەمگیرە ، ئەوە  ئێمەی کوردیش  بەشێکین لەو عالەمە!ئەگەر ڕاستە ئیسلام  لە خزمەتی مرۆڤایەتیدایە ، ئەوە ئێمەش  بەشێکین  لەومرۆڤانە.!ئەگەر  ڕاستە  ئیسلام  دینی  عەداڵەت وداد پەروەریە،ئەوە  دەبێ  مافی ئێمەشی  وەک  هەموو گەلانی دیکە  بەڕەسمی  ناسیبێ و  بیپاریزی. بەباوەری  من  هەموویان   ڕاستن ،  بۆئێمەش   بەرگری  لە ماف  هەقێکی ڕەوایە. هەرچۆنێک  بێ  بە فەرمانی   خوا هەرچی لەو  زەوی و عاسمانانە دا هـەن هەرهەموویان بـۆ مـرۆڤن و بـەسەریاندا  دابـەشکراوە.کوردیش  وەک بەشیک  لەو مرۆڤانە  کە خواپێی  دەڵێ  (یاایهاالناس) بەشی  خۆی پێبڕاوەو  ئیزنی پاراستن و ڕێزلێ گرتن و  ئاوەدان کردن و   تێیدا  ژیانی  پێداوە . بەختکردنی گیان  لە  پێناو ئەو مافە خواپێداوانەدا دەت گەێێنێتە  لوتکەی  بەرزی کەڕامەت و  شەڕافەت  کە بەشەهید پێناسەکراوە. گومان لەوە دانییە  خەباتی  ڕزگاریخوازانەی  گەلی  کورد  ئەرکێکی بـەرزی ئایینیەو بەدەقی قورعانی فەرمانی  بە جێهێنانی  دراوە  ،بـۆیە  پێشەوای  مـەزنی ئـێمە کە خۆی زانایەکی بەرزی   ئایینیش بووە ،  لەو  بوارەدا   سڵی  لێ نەکردوەو  پەنای  بـۆ هـیچ کـەس و وڵاتێکیش  نـەبردوە.بـەپێشکێش  کردنی   گیانی  دەرسی  فیداکاری ونەبەزی وسەردانە نـەواندنی فـێری ڕۆڵەکانی  کردوە.  بەگەلەکەی  فـەرمـووە :ئـیمـان بە قسە  نیەو بە عەمەلە و  لە ڕۆژی  سەڵاشدا  هەر  کردەوەیە  حیسابی لەسەردەکرێێ  نەک وتە.

ڕاستی  ئەوەیە  بەرزی  پلەی  شەهید  جێگای   گومان  نیە ، شتێکی کە دەبێ  سرنجی وردی  بدرێیتێ   ڕستەی  (فی سبیل الله)یە  بۆچون و  لێکدانەوەکانی  مـرۆڤەکان   لەو بوارەدا   لێک  جیان ، کە ئەوە  خۆی  باسێکی گەلێک  قوڵ و  گرینگە. بەڵام  ئەوەی دەبێی  بسەلمێندرێ  ئەوەیە  کە : ئیسلام  دینی  ئەقڵ و  مەنتیق و  بەڵگە نیشاندانە ، دینی باس و  وتووێژو  جەدەل و   تێڕامانە. مرۆی  موسوڵمان  دەبێ  زۆر  وردو  ژیرانە و بەقوڵی  بچێتە  ناو  ڕابردو و   ئێستاو تەنانەت  داهاتوش   بێنێتە   بەرچاو ،بۆ ئەوەی بزانێی  لەم جیهانەدا  چی  گوزەراوە،  پەیامبەرەکەی  چـۆنی   هەوڵ  بـۆ  پەرەپێدانی دینەکەی  داوەو  لە هەمانکاتدا چ بایخ و  ڕێزێکی  بۆ  مرۆڤ و   ژیانی   ئەم    جیهانەو پاراستنی  زێدو نیشتمان و  ئایینە  دژەکانیش  داناوە. هەروەها  بە شێوەی  زانستی   بزانێی چی  لە  دینەکەی   دەستکاری   کراوەو،  کامە بڕیارو  دەستورەکانی   وەک   خۆی ماوە.  بەکێ  کوتراوە شەهیدو  چ نرخێکی  بۆ دانراوە. ئەو  شتانەی کە دەبێ  گیانیان لە ڕێدا  بەخت  بکەی  چین و  چۆن  دیاری کراوەو  ئیسلام چۆن  بۆیان  تێکۆشاوە.پێغەمبەر (ص) دەفەرموێی: [ وا بۆ  ئەو  دنیایە    تێبکۆشن   وابزانن   نامرن ،  واش بۆ قیامەت  هەوڵ  بدەن   وەک   پیتان   وابێ   سبەینێ    دەمرن .]  ڕاگرتنی   باڵانسی ئەو درەنگ و  زویە  تەنیا  ئیمان و ئیرادەی  بە هێزی  دەوێ. کە پێشەوای ئێمە هەردوکیانی هەبوو. هەروەها  فەرمویە :[ هەر کەس لە ڕێگای  دینەکەی ، پاراستنی ماڵو،ناموسو، خوێنو  گیانو  شوێنی  ژیانەکەی دا بکوژرێ یان  بمرێ،   شەهیدی فی  سبیل الله یە.]  هەوڵ و تێکۆشان ماندو بـوونـ وکۆڵنەدان ، خۆبەختکردن و  قوربانی دان بـۆ بەڕێوەبردنی   هەرچی   باشترو  خاوێنتری ژیانی  مرۆڤەکان ، بەجۆرێک   کە مافە خوا پێداوەکانیان   پارێزراوو ڕێز  لێگیراوبێ، ئەوە  لە ڕای  خوادایە.   پاراستنی کەرامەت و  شەڕافەت و  کەسایەتی  مرۆڤەکان ، ئەوە  لە ڕای  خوادایە.بەرەنگاری زاڵمان و   زۆر  داران و  بەرگری  لە  مافی  ژێردەستان و هەژاران و بەربەرەکانی دەگەڵ نەخوێنەدەواری و  ناسینی  مافی مرۆڤانەی  وەک  یەکی ژن و  پیاوەکان  ئەوە  تێکۆشان   لە ڕای  خوادایە.  بۆیە  پێشەوای  ئێمەش  شەهیدی  ڕێگای   خوایە.  ئێستا  کە  باوەرمانوایە  بەگشتی تێکۆشان  بۆ  پاراستن  یان  وەدەست  هێنانی  ئەو مافو  حقوقانەی  کە خواب ۆ  مرۆی دیاری کردون و ئێمەی  کوردیش بەشێکین لەوان ، دڵنیاین  کە هەموقوربانیەکانمان لەو بوارەدا  لەڕیزی  ئەو  شەهیدانەن   کە  خوا  وەک  شەهید ی ڕێگای خۆی  حیسابیان  دەکا. پێشەوای  مەزنیئێمە  بە بەرچاوڕونی  ئەو  ئایەتو حەدیسانەو بە هەڵبژاردنی   ئەو ڕێبازەو  بە ئیمان  بەحەقانیەتی  خەباتەکەی   داو  تەڵەبانە  بەبێی هیچ  چاوەڕوانیەک سەری  لە ڕێی  گەلو  نیشتمانی  داناوەو  ئەو  ڕێبازەشی  بۆ  ئێمە بەمیرات  بە جێماوە. ئێمە  پێمان  وایە  شەهیدی  ڕێگای  خوایەو  خواش لە سوڕەی (بەقەڕە: ١٥٤ )دا فەرمویە :{ بەو  کەسانەی  لە ڕای  خوادا  کوژراون  مەڵێن مردون، ئەوانە  زیندونبەڵام  ئێوە نازانن}. هەروەها ئایەتی (١٥٧ ی سوڕەی ئالی عیمڕان ) دەڵێی: { ئەگەر  لە ڕای  خوادا  مردن  یان کوژران  وەبەر  ڕەحمەتی  خوا   دەکەونو ڕەحمەتی  ئەویش باشترە  لەو  شتانەی  کۆی دەکەنەوە}.  ناوەرۆکی  ئەم  ئایەتانە وزۆریتریش   ئەوە مان پێ دەڵێن کە :  بەرگڕی و  گیانبەختکردن بۆ  پاراستنی  مافێکی خوا پێداو   ڕەوایەو  گیان بەختکردوان  جێگەیان  لە بەهەشتی  خوا دایە.

دوایین  قسە  ئەوەیە :  ئێمە  پێمان وایە   لە خەبات   بۆ ڕزگاریدا  بەڕێگەیەکدا  دەرۆین کە پێغه‌مبه‌ر ڕێبواری بوە ، بەڵێنی  خۆمان  دەگەڵ  خواو  پێغەمبەرەکەمان  بردۆتە  سەر . ئەوەتا  لە قورعاندا  خوا  فەرمویە : { لەناو  خاوەن  باوەڕاندا  پیاوانی  واهەن  ئەو پەیمانەی  دەگەڵ  خوا  بەستویانە   بەجێیان  هێناوە ، هێندێکیان   گیانیان بەخت  کردوەو هێندێکیشیان   چاوەروانن و  توزقاڵێک   سۆزی  خۆیان  نەگۆڕیوە }.  بەڵێێ!    پێشەواو شەهیدەکانمان  لـەو ڕێگایەدا    گیانیان  بەختکردوەو  ئێمەش  چـاوەڕوانـ و  ئامادەی قوربانیدانین.بەشێوەیەکی   بنەڕەتی  شەهید  لە ئیسلامدا   بەو کەسانە دەکوترێێ کە لە بەرەنگاری   دەگەڵ دژمندا  گیانیان  بەخت دەکەن، جا ئەو  بەڕەنگاریە   بۆ پاراستنی وڵات ، بۆ پێشگیری  لە هێرش  بۆسەر ئیسلام  ، بۆ بەرەنگار  بونەوەی داگیر کەران وپاراستنی کەسایەتی وکەرامەتی   مرۆڤەکان  بێ ، یان بۆ ڕزگاری  گەل و  نیشتمان  بێ.دیارە  دوای  هەڵدانی  ئەقڵ و  شعورو   چونەسەری پلەی زانست وبۆنی ئامرازی بەهێزی پێوەندی وگەیاندن وڕاگەیاندن،  تێکۆشانەکە دەبێ بکەوێتە گۆڕەپانی قسە ونوسین و  لێکدانەوەو  هەڵسەنگاندن و  جێگەیەک  بۆ لێکدان وکوشتن و  بڕین و وێران کردن و بەزۆر  خۆسەپاندن نەماوە، لەو  شوێنە ئەقڵ ومەنتیق هەبێ و  کاریان پێ بکرێ بێگومان زۆرداریـ و  شەڕاژۆیی   جێگەی   نـەماوە . بـەداخەوە ئەوەش کە ئێستا دەیبینین کە لە  ژێر  ناوی  دین  دەکوژن و  دەسوتێنن  وێران  دەکەن بە دڵنیایەوە نە دینە ونە بۆپەرەپێدانی دینە و بەڵکو ئامانجێکی  شومی  داگیرکاری و  قەڵاچۆی گەلانە بەناوی دین پیادە کراوە .  ئەوەی ئێستا  لەعێڕاقیش  دەگوزەرێێ   بەباوەری  من پیلانێکی دژە کوردەو هەوڵ دەدا  پـێش بـەڕەوتی  ئـازادی  کوردستان و  گەلی کورد بە گشتی بگرێ و   لە باشورەوە  دەستی  پێکراوە.  هەموو  وڵاتانی  داگیرکەری   کوردستان و گەلانی  داگیرکەر ڕاستەو  خۆو  ناڕاستەو خۆ ، بەئاشکرا وبە  نەهێنی و  لە ژێرناوی جۆراوجۆرو تەنانەت  لە ژێر  ناوی  یارمەتی و  دڵسۆزیش  لەو  پیلانە دا بەشدارن،بۆیە   کورد دەبێێ    لەو پەڕی   وشیاری دابێ و  تاقیکراوەکان تاقی نەکاتەوەو   دۆست ودوژمنی  ڕاستەقینە  نەک  بەرژەوەندی  لێک  بکاتەوە . پەنا بەخوا . {فالله  خیر حافظا وهو أرحم ألراحمین}.  شەهیدکرانی   پێشەواو  هاواڵانی   پێمان  دەڵێێن   بڕوا  بەدوژمن هەڵەیە و لە زیان  زیاتر   چیتری   نییە..  بڕوانن   بەدوای    شەهید    پێشەوا دا   قاسملو دێتە  گۆڕەپانی  خەباتەکەو  ڕاست  بەو  جۆرە  شەهید  دەبێی  کە پێشەوای  پێی   شەهید کرا . ئەو نەمرەش   پێمان  دەڵێی:  ئێمە  لە ڕۆژی   شەهیداندا  ناگرین و  ڕەش  ناپۆشین، بەڵام  ڕێگەیان   درێژە  دەدەین،  لەو ڕێگایەشدا  یان  سەردەکەوێن   یان  ئێمەش  شەهید دەبین.  لەو  ڕۆژە   ماتەمینەدا   دەگەڵ  ناردنی  هەزاران   چەپکە گوڵی وەفاو  دڵسۆزی بۆ گیانی   پاکی  سەر  قافلەی  شەهیدان   پێشەوای   مەزن و   سەرجەم شەهیدانی  ڕێگای ڕزگاری  گەل و  نیشتمان  ئاواتە  خوازم   لە خەبات  سڵ نەکەین و  لە ڕیبازی   شەهیدان لا نەدەین. ئێمەش  یان سەدەکەوین  یان  لەو  ڕێبازەدا   گیان  بەخت  دەکەین  . بەگەلیش دەڵێێن : دڵنیا بن  لەوە  کە  شەهیدانمان  لە ڕیزی شەهیدی  فی سبیل الله  دان .

             براتان     مەلابرایمی   مەجیدپور   ٣ /خاکەلێوەی   ٢٧١٥ ی کاردی 

            ٢٣ /٣  / ٢٠١٥  زایینی .   هولەند

لعنةالله‌ علی الظالمین

به‌ داخه‌وه‌ رۆژی هه‌ینی رێکه‌وتی 29ی ره‌شه‌مه‌ی 1393ی هه‌تاوی ، به‌ هۆی چه‌ند کرده‌وه‌یه‌کی ترۆریستی له‌ ناو ئاپۆرای جه‌ماوه‌رله‌ شاری حه‌سه‌که‌ی کوردستانی رۆژئاوا که‌ بۆ پێشوازی کردن له‌ ساڵی تازه‌ کۆ ببوونه‌وه‌ له‌ لایه‌ن ترۆریست په‌روه‌رانی جه‌هل و نه‌فامی   سه‌ر به‌ تاقمی ترۆریستی داعش چه‌ند ته‌قینه‌وه‌یه‌ک روویدا که‌ بۆوه‌ هۆی شه‌هید بوونی 56 مرۆڤی بێ تاوان  ونیزیک به‌150 که‌سیش بریندار بوون ،یه‌کێتی زانایانی ئایینی کوردستانی ئێران وێرای ئیدانه‌ کردنی ئه‌م کردوه‌ قێزه‌ونه‌ که‌ دوور له‌ هه‌موو ره‌وشتێکی مرۆڤایه‌تی ودژ به‌ بنه‌ماکانی ئایینی پیرۆزی ئیسلامه‌ ،له‌ خوداوه‌ندی مه‌زن ده‌پارێینه‌وه‌ که‌ روحی شه‌هیدانی ئه‌م کرده‌وه‌ ترۆریستییه‌ به‌ به‌هه‌شتی به‌رین شاد بکات وهیوادارین برینی برینداران هه‌رچی زووترسارێژ بێته‌وه‌،

یه‌کێتی زانایانی ئایینی کوردستانی ئێران

29ی ره‌شه‌مه‌ی 1393ی هه‌تاوی

کۆچی دوایی مامۆستایه‌کی ئایینی له‌ ده‌ڤه‌ری بانه‌

کل نفس ذائقةالموت

به‌ داخ وکه‌سه‌ره‌وه‌ رۆژی چوارشه‌م رێکه‌وتی 20ی ره‌شه‌مه‌ی 1393ی هه‌تاوی ئاگادار کراینه‌وه‌ که‌سایه‌تی ئایینی وخۆشناو ونیشتمانپه‌روه‌ری ده‌ڤه‌ری بانه‌ جه‌نابی حاجی مامۆستا ئه‌حمه‌دی دافعی به‌ هۆی نه‌خۆشی کۆچی دوایی کرد ،یه‌کێتی زانایانی ئایینی کوردستانی ئێران وێرای پرسه‌وسه‌ره‌خۆشی له‌ بنه‌ماڵه‌و سه‌رجه‌م خه‌ڵکی شاری بانه‌ له‌ خوداوه‌ندی مه‌زن ده‌پارێینه‌وه‌ به‌ به‌هه‌شتی به‌رین شادیان بکات وسه‌بووری ببه‌خشیته‌ بنه‌ماڵه‌ به‌رێزه‌که‌یان،

مامۆستای پایه‌به‌رز وخودالێخۆشبوو مرۆڤێکی خاوه‌ن باوه‌ر ونیشتمانپه‌روه‌ر بوو،هه‌رده‌م باوه‌ری به‌ بزووتنه‌وه‌ی رزگاریخوازی نه‌ته‌وه‌ی کورد بوو،له‌م راستایه‌شدا ئه‌ندامێتی حیزبی دێموکراتی کوردستانی ئێرانی پێ به‌خشرابوو،ئاواتی رزگاری نه‌ته‌وه‌ چه‌وساوه‌که‌ی بوو که‌ زۆر به‌داخه‌وه‌ نه‌یتوانی به‌یداخی شه‌کاوه‌ی گه‌له‌کی له کوردستانێکی ئازاد دا ببینێت ومه‌رگ زیاتر مه‌ودای نه‌داو کۆچی دوایی کرد وله‌ناو ئاپۆرای جه‌ماوه‌ری شاری بانه‌ که‌ گووندی شوێ به‌ خاکی پاکی کوردستان ئه‌سپێردرا؛انا لله‌ وانا الیه‌ راجعون :روحی شاد

یه‌کێتی زانایانی ئایینی کوردستانی ئێران

21ی ره‌شه‌مه‌ی 1393ی هه‌تاوی  

یزکا ره‌وتی له‌ سێداره‌دانی لاونی کورد به‌ ده‌ستی رژیمی ئیسلامی ئێران ئیدانه‌ ده‌کات

واعتصموا بحبل الله‌ جمیعا ولا تفرقوا

خه‌ڵکی مسوڵمان وباوره‌مه‌ند به‌ ئایینی پیرۆزی ئیسلام.

ده‌ستی ره‌شی رژیمی دژه‌ ئایینی ودژه‌ مرۆیی ویلایه‌تی نابه‌حه‌قی فه‌قیه‌ی ئێران که‌ ساڵانێکه‌ به‌ ناوی ئایینی پیرۆزی ئیسلام ده‌سه‌ڵاتی ره‌شی خۆیان به‌ سه‌ر کۆمه‌ڵگایی مسوڵمانی ئێران به‌ گشتی وکوردستان به‌ تایبه‌تی سه‌پاندووه‌، وله‌ هه‌ر چه‌شنه‌ کرده‌وه‌یه‌کی دژه‌ ئایینی ودژه‌ مرۆیی خۆی نه‌پاراستووه‌ ئه‌مجاره‌ش به‌ بیانوی دژایه‌تی له‌ گه‌ڵ خودا وله‌ گه‌ڵ نوێنه‌ری ئیمامی ون بووی خۆیان چه‌ندین لاوی بێ تاوانی کوردیان که‌ ته‌نیا تاوانیان مه‌زهه‌بی جیاوازیان بوو له‌ سێداره‌دران، ئه‌م کرده‌وه‌ نامرۆڤانه‌ زیاتر له‌ بێ ده‌نگی کۆمه‌ڵگایی ئێران دایه‌ که‌ که‌وا ئه‌م رژیمه‌ سته‌مکاره‌ رۆژ به‌رۆژ په‌ره‌ به‌ کوشت وکوشتار وئه‌شکه‌نجه‌ی لاوانمان ده‌دات، له‌ راستیدا بێ ده‌نگی کۆمه‌ڵگا له‌ ئاست ئه‌م هه‌مووه‌ سته‌مه‌ پێچه‌وانه‌ی بنه‌ماکانی ئایینی پیرۆزی ئیسلامه‌ ، هه‌ر بۆیه‌ یه‌کێتی زانایانی ئایینی کوردستانی ئێران وێرای ئیدانه‌ کردنی ئه‌م کرده‌وه‌ نامرۆڤانه‌ی رژیمی کۆماری به‌ نێو ئیسلامی ئێران داوا له‌ سه‌ر جه‌م مسوڵمانانی جیهان وئێران ده‌کات ده‌نگی نارزایه‌تی خۆیان به‌رز بکه‌نه‌وه‌ و چیتر ئیزن نه‌ده‌ن لاوانمان به‌ بیانووی جۆراوجۆر له‌ سێداره‌ بدرێن ،دڵنیا بن به‌ یه‌کێتی ویه‌کرێزیتان پشتی هه‌ر سته‌مکارێک ده‌شکێنن.

یه‌کێتی زانایانی ئایینی کوردستانی ئێران

12ی ره‌شه‌مه‌ی 1393ی هه‌تاوی